ليه بنخاف من الجن ؟

مقال رائع للصحفى / نادر فوده لازم تقروه
ـــــــــــــــــــــــــــــــــــــــــــــــــــــــــــــــــــــــــــــــــــ
ليه بنخاف من الجن ؟
وايه اللى بيخلينا نقول المكان ده مسكون ولا لا ؟ وليه كل كل حركة بنسمعها بنقول جن وعفاريت ؟ وليه كل حاجة غريبة علينا بندخلها في عالم الجن والعفاريت ؟
معظمنا لو مش كلنا بنخاف من الجن والعفاريت ، وفيه ناس من كتر خوفها ما بتقولش حتى الاسم يعني بنسمع ناس بتقول : أعوذ بالله ، اللى بالي بالك ، يا لطيف ، اللهم أسكنهم مساكنهم ، أشتات أشتوت ، اللى ما يتسموش ، حابس حابس ، ذكرهم في الكانون … ألفاظ كتير من دي عشان ما يلفظوش الاسم … يالطيف
الاعلام بيزود الخوف ده جوانا وبيوصلنا رسائل بتأكد إنهم موجودين في كل مكان ( طبعاً إنتم عارفين مين ) بنشوف في الأفلام إن العفاريت والجن لما بيكونوا في مكان الكهرباء فيه تزيد وتقل واللمبات نورها بيقل وبيزيد و صوت الموجات الكهربائية بيعلى ؟ وبنصدق الكلام ده … ولا فكرنا في يوم أو سألنا نفسنا سؤال : هو إيه علاقة الجن بالكهرباء هم بيدخلوا الأسلاك ولا إيه ؟ وبيدخلوا في الأسلاك ليه ويبلعبوا في النور ليه أساساً ؟ وهل الجن والعفاريت مش عارفين يخوفوا الناس إلا باللعب في الكهرباء حاجة غريبة بجد مال الجن والعفاريت بالكهربا .
بنشوف في الأماكن اللي فيها العالم دول إنه الشباك ولا الباب بيفتح ويقفل … هو الجن محتاج يفتح ويقفل شبابيك وأبواب عشان يقولك أنا موجود … ولا تسمع صوت صرير الباب … طيب أكيد الباب قديم ولازم يعمل صوت لما ينفتح … ولا يجيلك منظر والعفريت ولا الجني إبن الجني يقولك أووووووووووووووووووووووو … حاجات هبلة بنشوفها كتير في الأفلام وما بنفكرش فيها وإيه علاقة المواضيع دي باللي بنتكلم عنهم وبلاش نقول اسمهم كتير حرصاً على مشاعر الناس اللي بتخاف .
طبيعي إن الجن والعفاريت موجودين في كل مكان ومش بيؤذوا حد إلا لو حد أذاهم أو اتعرضلهم
… وفيه في عالمنا العربي حاجات كتير مرتبطة بالموضوع ده مثلاً : عندنا يقولك ماتدلقش مية سخنة في المطبخ والحمام ؟ اوك … بس ليه ما احنا بنستحمى بمية سخنة وبندلق المية وهي بتغلي وكل العالم بيعملوا كدة ومفيش حاجة بتحصل … بيقولك متغنيش في الحمام أحسن يلمسوك ولا يتلبسوك … ما العالم كله بيغني جات علينا إحنا ليه ؟
المقدمة دي مهمة جداً عشان نعرف إن الخوف اللي عندنا هو اللي بيخلينا نشوف حاجات مش موجودة أساساً وده بيزوده الإعلام والقصص الموروثة والخرافات اللي بنسمعها من ناس كتير ، المفروض إننا نخاف وده أمر طبيعي بس نخاف بحساب وعقل مش بالطريقة اللي بنشوفها عند ناس كتير ، أنا حبيت أوضح بعض الأمور اللي تخلينا منخفش ومنقلقش من موضوع زي ده ، وأتمنى إنه كل واحد فينا يفكر بطريقة علمية في الحاجات دي :
ـ لو سمعت صوت في مكان مفيش فيه حد غيرك ما تفكرش إنه جن وعفاريت لأنه لو فكرت كدة حتهيأ نفسك إنهم موجودين وحتسمع اصوات زيادة وحركات زيادة … كل ده من جواك … وهم مالهومش علاقة بالموضوع أساساً ده لو مكنش الصوت جي من برة من عند الجيران ولا من الشارع وإنت حاسس إنه قريب أو إنه من عندك …
ـ لو نور اتقفل واشتغل أو النور بيختفي ويظهر عادي الكهرباء فيها مشكلة ومفتاح الكهرباء يمكن صناعة صيني عشان كدة بيلمس ومحتاج تصليح أو تغيير .
ـ لو التلفزيون كنت قافله ولقيته شغال يمكن الريموت بايظ وبيرسل إشارات لوحده وبرضه تلاقيه صناعة صيني وأي كلام ومش محتاج إلا إنك تجيب حاجة أصلي .
ـ لو سمعت صوت حد ماشي في مكان مفيهوش غيرك من الممكن يكون الهواء وهو بيتحرك بيعمل أصوات غريبة أو فيه حاجة بتعمل الصوت ده وإنت مش عارف هي إيه .
ـ لو سمعت صوت حد جنبك بيتنفس أو حاسس إنه في حد وراك وحاسس بيه يمكن الجو حر والرطوبة عالية وهدومك بتلزق .
ـ لو سمعت حد بيغني في مكان مفهوش ناس عادي لأني الأغاني دي بتاعت بني أدميين مش بتاعت مش عارف مين .
ـ لو حسيت إنه حد بينده عليك وإنت لوحدك ومفيش حد معاك أكيد حتكون تهيؤات أو الصوت ده من جواك ومن نسج خيالك .
ـ لو حسيت إنه فيه أحد عدى من قدامك وأساساً مفيش حد في المكان اللي إنت فيه برضه تهيؤات وقدراتك على التخيل واسعة ما شاء الله عليك .
ـ لو لقيت حد قدامك قاعد وإنت أساساً كنت لوحدك ومفيش في المكان حد غيرك برضه متخفش يمكن كان فيه حد قاعد وإنت مش واخد بالك .
...............ِِِِِِ😈
أقولك بصراحة أخر وحدة دي أنا مش مقتنعه بيها لازم تخاف لأنه مالهاش تفسير تاني غير إنه عفريت ولا جني وإنسى كل الكلام اللى قلناه في الأول خالص أنا بس حبيت أطمنك لغاية ما تشوف بعينك إنه فيه فعلاً جن وعفاريت … يالطيف … حابس حابس … أشتات أشتوت


ana peso

Phasellus facilisis convallis metus, ut imperdiet augue auctor nec. Duis at velit id augue lobortis porta. Sed varius, enim accumsan aliquam tincidunt, tortor urna vulputate quam, eget finibus urna est in augue.

ليست هناك تعليقات:

إرسال تعليق